O colectivo Espazo Lectura organiza mañá ás 18.30 horas un obradoiro infantil de ilustración, para nenos e nenas de 3 a 9 anos, a partir dos libros “Pancho” (2º Premio Nacional de Ilustración 2003) e “A viaxe de Pancho”, do autor e ilustrador Antonio Santos. A actividade, a cargo de Beatriz Núñez, celebrarase na Casa da Lectura (Nogueira, 8-Donas).
Con este obradoiro bota a andar novamente a programación de animación lectora deste colectivo, que para o mes de outubro prepara as xornadas “Lendo en familia”, nas que participará, entre outros escritores e expertos en literatura infantil, a autora Paula Carballeira, artífice de títulos como “Paco”, “Mateo” e “Smara”. A súa intervención será o día 17 a partir das 10:30 horas.
Entre as actividades lúdicas anteriores, destaca o Xogo de Espazo Lectura, no que poden participar ata catro equipos de nenos e nenas que teñen que ir avanzando por un taboleiro xigante a partir dos puntos que obteñen tirando un dado, superando probas de habilidade ou respostando a preguntas relacionadas con contos como “Garavanciño”.
“Que lle deron de comer os pais de Garavanciño ao boi para que expulsase o seu fillo?”
No seu percorrido polo taboleiro, os participantes irán atopando algunhas sorpresas. Así, os recadros nos que saen a ponte de “Chibos chibóns” ou os personaxes de “Catarina e o oso”, permítenlles avanzar ou retroceder unhas casiñas. E caer na ficha de “A xoaniña rosmona” supón agardar un turno sen tirar o dado; todo o contrario do que acontece na de Espazo Lectura...
“De Espazo Lectura a Espazo Lectura, e a seguir coa aventura!”
