PRESENTACIÓN DOS NOVOS POEMARIOS DA COLECCIÓN TAMBO
O poeta coruñés Manuel Álvarez Torneiro presentará o seu novo libro, “Onde nunca e mañá”, publicado na colección Tambodo selo editorial Faktoría K, este venres 6 de xuño ás 20:00 horas en Portas Ártabras. Trátase dunha obra na que o autor -galardoado en 2013 co Premio Nacional de Poesía- volve afondar na súa memoria para rastrexar o pasado dende o compromiso coa exactitude da palabra.
Na presentación de “Onde nunca é mañá” participarán tamén o director da colección Tambo, Luís Rei Núñez, e a profesora Teresa Seara, que ademais traduciu ao castelán o anterior poemario de Álvarez Torneiro, “Os ángulos da brasa”, para a editorial Visor Libros.
Sumando xa a súa cuarta reimpresión en galego, “Os ángulos da brasa” fora galardoado co Premio Ánxel Casal de Poesía 2012, Premio da Crítica Española 2012 e Premio de Poesía da Asociación de Escritores en Lingua Galega 2012; un ronsel de recoñecementos que culminou co Premio Nacional de Poesía 2013.
No seu último poemario, Manuel Álvarez Torneiro busca dun xeito máis claro a exquisitez da naturalidade a través da aproximación dos versos á cadencia do sermón. A súa vivencia da música e da arte, a súa característica enumeración de conceptos paradóxicos e un amplo abano de imaxes poderosamente metafóricas marcan tamén “Onde nunca é mañá”, convertido nun inventario de alentos e latexos dun poeta en constante batalla a favor da vida.
Destaca na edición do libro a presenza de debuxos inéditos do pintor coruñés Alejandro González Pascual, co que Álvarez Torneiro tivo moita amizade.
Trala presentación na Coruña, “Onde nunca é mañá” presentarase tamén na Libraría Couceiro de Santiago, o vindeiro xoves 12 de xuño ás 20:00 horas.
O autor
Luís Rei Núñez presentará o seu novo poemario, “Estrela do norte”, publicado na colección Tambo do selo Faktoría K de Libros, nun serán literario-musical que se celebrará este mércores 11 de xuño, ás 20:00 horas, no Pazo de Mugartegui (Praza da Pedreira), en Pontevedra. Na presentación participarán a escritora Fina Casalderrey, membro da Real Academia Galega, e o músico Luís Soto, frautista da Real Filharmonía de Galicia.
Os poemas de “Estrela do norte” transitan nun espazo fuxidío entre a tradición -de raíz tanto culta como popular- e a contemporaneidade. Son composicións marcadas pola métrica e pola rima, co propósito de achegar os lectores ao territorio das emocións a través dunha traballada musicalidade. O resultado é unha obra deliberadamente figurativa e impregnada dunha certa melancolía, coa que Luís Rei Núñez retorna ao xénero lírico once anos despois do seu último poemario, “Alma mareira” (2003).
Luís Rei Núñez iniciou a sua traxectoria literaria en 1982 e, trala publicación de “Para matar ao tempo”, publicou outros tres libros de poemas: “Arca dos faiados” (1985), “A rolda invisible” (1988) e “A casa da brétema” (1994), reunidas logo nun único tomo titulado “A rolda invisible” (2000). Ademais, é autor dunha extensa obra narrativa na que destacan “Expediente Artieda” (2000), “Toda a vida” (2005), “O señor Lugrís e a negra sombra” (2007), “Monte Louro” (2009), “Cita en Fisterra” (2011) e “Días que non foron” (2013), aos que hai que engadir a biografía de Rafael Dieste “A travesía dun século” (1987) e o volume de ensaios “Poetas Andantes Navegantes” (1995). Recibiu os premios Xerais, Blanco Amor e da Crítica Española, entre outras distincións.
Tralo recital en Pontevedra, “Estrela do norte” presentarase tamén na Libraría Couceiro de Santiago, o vindeiro xoves 12 de xuño ás 20:00 horas.