FESTA DE DISFRACES EN LIBROS PARA SOÑAR
Dúas bravas corsarias están á fronte da nave pirata de LIBROS PARA SOÑAR nestes días de Entroido: Sandra e Carmela foron as anfitrionas da festa de disfraces celebrada na libraría infantil do Casco Vello vigués. Con elas, a sesión de animación lectora encheuse de pequenas flamencas e princesas, de espadachíns e vaqueiros. Tamén houbo un obradoiro de maquillaxe para que todos luciran a mellor caracterización acorde ao vestiario dun día tan especial.
E con motivo do Día dos Namorados, algúns relatos incluidos no repertorio trataron sobre o amor: “Hilderita e Maximiliano”, de Fernando Krahn, editado por KALANDRAKA, e “Crocodilo namorado”, de Daniela Kulot, pertencente ao selo FAKTORÍA K, fixeron agromar os sorrisos dos cativos. A célebre historia da parella de xoaniñas que emprenden xuntas unha romántica viaxe, ou as estratexias de Crocodilo para chamar a atención de Xirafa foron os principais alicientes da sesión infantil.
Este vindeiro venres 19, a partir das 18:30 horas, LIBROS PARA SOÑAR recibirá o autor Toño Núñez, que vai presentar a súa obra máis recente: “Mago Goma”. Ademais, o próximo mércores día 24 a partir das 17:30 horas, celebrarase unha nova sesión de contos para bebés e nen@s ata tres anos, acompañados dos seus pais e nais. Esta actividade especial que ofrece LIBROS PARA SOÑAR ten unha duración aproximada de 30 minutos: baséase en contidos asequibles para os cativos, nos que prima o factor visual e a expresión corporal. Tamén se ofrecen consellos e pautas de actuación no ámbito familiar para rodealos dos materiais máis axeitados á súa idade.