Que fai falta?

A obra de Gianni Rodari é esencial e, no ano do seu centenario, corresponde relela e propagala. O texto de «Que fai falta?» -un razoamento deductivo, ou siloxismo- conserva toda a súa forza innovadora, dende a sinxeleza e o enxeño. É o exemplo perfecto de como o autor convertía as palabras e as ideas en xoguete poético e intelixente; unha lectura que o cantautor italiano Sergio Endrigo converteu en canción. O relato segue unha sucesión lóxica e graduada sobre a orixe dun obxecto cotiá, que culmina no máis fondo e, á vez, fermoso da natureza: para acadar algo moi grande, ás veces abonda co mínimo. Un libro que une a elegancia da xeometría, seguindo unha estrutura literaria circular, coa fragancia da poesía e coa orixinalidade da proposta estética.

Os collages de Silvia Bonanni practican ese salto creativo e transformador da arte, cunha proposta laboriosa e chea de colorido que combina todo tipo de recortes de papel impreso con elementos téxtiles.