Inventando números

Este maxistral relato é un dos «Contos por teléfono» de Gianni Rodari, gran renovador da literatura infantil e da pedagoxía. Fiel á promesa de contarlle cada noite un conto á súa filla malia a distancia que os separa, o señor Bianchi chámaa e tan deliciosas son as historias que as operadoras paralizan as liñas para oílo. No diálogo-xogo xorden preguntas tan verosímiles como a lonxitude entre dous puntos, e outras tan sorprendentes e surrealistas como canto pesa unha bágoa ou canto mide un conto. As respostas rebordan enxeño, imaxinación e creatividade, cualidades de Rodari que tamén están presentes en «Confundindo historias» e que son ingredientes indispensables no crecemento dos primeiros lectores. «Inventando números» tamén adquire autonomía propia como álbum coas orixinais ilustracións de Alessandro Sanna, cheas de colorido e pinceladas que xogan a crear formas coas cifras.