FEIRA DO LIBRO DA CORUÑA: DAVID PINTOR

O venres 2 de agosto, a partir das 19:00 horas, o autor e ilustrador coruñés David Pintor estará na caseta da libraría Lume na Feira do Libro da Coruña para asinar exemplares das súas obras, entre as que se encontran «Tartaruga vs. Lebre, o desquite» -o seu último álbum publicado por KALANDRAKA-, «Nicomedes o pelado», «Sete chaves para abrir os soños», «Contos para nenos que dormen deseguida», «Almanaque musical» ou a serie “Cidades”.

Humorista gráfico, ilustrador e pintor, David Pintor ten recibido numerosos recoñecementos ao longo da súa traxectoria: os premios Andersen 2015 (Italia) e Nami Island 2013 (Corea), o premio da Society of News Design, o Pura e Dora Vázquez de ilustración, o Premio Internacional Clermont-Ferrand de cadernos de viaxe, o Premio Ilustrador do Ano Città del Sol e o 2º Premio da Feira do Libro de Sharjah (Dubai). Foi finalista dos CJ Picture Book Awards (2011) e figura na lista The White Ravens (2009, 2011 e 2014). Foi seleccionado en varias edicións da Bienal de Bratislava e da Feira Internacional de Boloña.