Saltón no camiño

«Saltón no camiño» reúne seis relatos do destacado autor estadounidense Arnold Lobel: O Club, Unha casa nova, A varredora, A viaxe, Sempre e Pola tarde. Con cada un dos personaxes que atopa no seu longo camiñar, vivirá unha aventura, unha experiencia que vai máis aló do que aparentemente amosa. Porque neste libro, o cerne está na propia viaxe. As historias de Saltón, incansable camiñante e cidadán do mundo, trazan perfís inherentes á condición humana; transmítenlles aos lectores a poesía que se oculta no cotiá. Mentres que para o público infantil cada relato é un episodio máis nas peripecias de tan peculiar protagonista, por riba das dificultades que atopa no seu traxecto, os adultos atoparán nesta obra outras lecturas enriquecedoras: entre elas, que a felicidade está nas cousas simples, lonxe de cuestións que nos complican a vida e nos impiden acadar os nosos obxectivos ou gozar do día a día.

Que os relatos de Arnold Lobel sexan sinxelos non significa que sexan superficiais ou banais. Os máis deles tratan sobre a amizade e o amor, presentan a aventura de vivir, nunca a rutina nin a monotonía. Por iso, para Saltón cada día é como o comezo dunha nova vida. Movéndose entre a tenrura e o humor, os libros de Lobel constan de pequenas historias independentes, mais unidas por un fío común, como acontece en «Sopa de rato», «Contos de ratiños», «O porquiño», «Tío Elefante» e «El libro de los guarripios».

Ademais dos textos, Lobel tamén é o ilustrador dos seus libros e o seu grafismo reflicte a mesma tenrura que a obra literaria. Os debuxos que acompañan os textos -de trazo firme e reducida paleta de cores- forman parte esencial e indivisible dun conxunto: as palabras non se entenderían sen a presenza das imaxes.