Edadrebil. 7 contos e 1 espello

Publicado orixinalmente en 1980, “Edadrebil. 7 contos e 1 espello” é un canto á liberdade creativa e unha excelente maneira de iniciarse nunha literatura que se le e se xoga. Sete viaxes a través da fantasía que convidan á participación e estimulan a imaxinación e a intelixencia de lectoras e lectores Un can que se namora da lúa e non sabe ladrar, un home do saco sen nenos a quen asustar e unha familia que viaxa por unha autoestrada do tempo son algúns dos protagonistas destes relatos tan divertidos como transgresores e surrealistas que renovaron a narrativa infantil e xuvenil, e que seguen considerándose insólitos e atraentes hoxe en día. O volume péchase cunha historia que só pode descifrarse grazas ao espello que acompaña o libro.

As sublimes e vangardistas ilustracións de Miguel Calatayud son o complemento ideal, pola súa dimensión simbólica e o seu peculiar xogo xeométrico e cromático, paralelo ao literario. Os lectores deleitaranse con estas ilustracións imprescindibles que son o ramo desta obra, considerada na LIX como unha das 100 mellores do século XX.