27 historias para tomar a sopa

A apaixonante historia da máquina de saltos-xira-balanceadoratocabuguinas, os gustos culinarios das vacas, o temor a voar dunha bolboreta recén nacida ou a xenerosidade dun esquío cunha familia de ratiños campestres son algúns dos relatos breves -pero de intenso sabor- que vai debullando unha nai para abrir o apetito do seu fillo. As narracións humorísticas de Ursula Wölfel complétanse coa sorprendente proposta gráfica de Pablo Bernasconi, de luminoso colorido, coas técnicas da colaxe e da fotomontaxe. Para tomar a sopa, ir á cama, bañarse... calquera actividade volverase irresistible se a precede algún destes contos, de linguaxe sinxela.

O gato que comía flan de chocolate, a lebre que salvou as demais dos cazadores grazas á agudeza das súas grandes orellas, os avatares dun coche de xoguete que caeu nas galerías subterráneas dunha toupa... Úrsula Wölfel amosa neste libro -o primeiro dunha divertida serie- a súa habilidade para conectar coa sensibilidad infantil e captar a súa atención.