A amiga de osiño

A finais dos anos 50 do século pasado, Else Holmelund Minarik e Maurice Sendak comezaron a publicar os títulos dunha serie que, case seis décadas despois, segue conservando o encanto e a tenrura dos contos de antano, reforzados polo estilo dos antigos gravados, aderezados con suaves pátinas de cor. “A amiga de Osiño” conta a ilusión que experimenta este entrañable personaxe humanizado ao coñecer a Emilia, coa quen comparte paseos, charlas e festas xunto con outros habitantes do bosque, ata o momento de tristeza no que teñen que separarse ao final do verán. O valor da amizade, descubrir gustos comúns, establecer unha complicidade mutua e axudarse ante as dificultades son parte das vivencias que recolle esta obra, cun estilo sinxelo e lúdico. Así, os novos amigos prometen reencontrarse ao verán seguinte, mentres os autores do libro fannos partícipes do gran momento no que Osiño é quen de comezar a trazar as súas primeiras letras, estreando un agasallo moi especial.