Máis alá da fiestra

“Máis alá da fiestra” é o terceiro título da triloxía de contos oníricos e e sobre os sentimentos da que forman parte “Onde viven os monstros” e “Na cociña de noite”. Publicouse en 1981, logo de que Maurice Sendak viaxara a Alemaña a propósito de ilustrar os contos dos irmáns Grimm. A pegada dos pintores románticos alemáns -en concreto Philipp Otto Runge- quedou marcada neste libro. Tamén se percibe a influencia dos contos de fadas, nos que Sendak se baseou para amosar as emocións da protagonista pola súa irmá pequena, á que deberá rescatar -afrontando a súa responsabilidade e con valentía- dos trasnos que a raptaron. Ademais, aborda a capacidade para resolver os erros cometidos, a lealdade cun mesmo e cos demais nun mundo confuso.

Destaca a combinación de dúas melodías -visual e sonora- mesturándose, dando lugar a mensaxes cheas de ambigüidade que, malia todo, son captadas polos lectores infantís de forma intuitiva. As ilustracións están repletas de detalles, símbolos e referencias: por exemplo, a natureza volve medrar proporcionalmente á intensidade da fantasía.

"É basicamente a miña historia e a da miña irmá”, dixo Sendak sobre esta obra. “Ela é Aida e o seu anoxo por ter que coidarme. Insinuar iso nun libro para nenos resulta duro porque hai un concepto trabucado do que é un libro infantil, do que debe conter e do que non. En esencia, a idea é que sexan sans, divertidos, enxeñosos e optimistas; que non amosen as pequenas miserias da vida real. Pero eu lembro como era a vida real e non sabía sobre que outra cousa podía escribir”.