Na cociña de noite

“Na cociña de noite” é un clásico de 1970 no que Maurice Sendak evoca lembranzas da súa nenez: o autor tiña 11 anos cando, na Feira de Nova York, quedou marabillado diante do escaparate da pastelaría Sunshine Bakers, cuxo lema era “Nós forneamos para ti mentres ti durmes”. Anos despois, Sendak contaría que este libro foi unha especie de vinganza: “Agora son o bastante maior para quedar esperto pola noite e saber que pasa Na cociña de noite!”. Trátase dun relato onírico, un texto rimado que transmite diversión e enerxía, protagonizado por un neno e tres pasteleiros caracterizados como Oliver Hardy. As ilustracións son unha homenaxe ao Little Nemo in Slumberland, de Winsor McCay, do que recoñecía a súa influencia artística: “Debuxamos, non sobre a memoria literal da nenez, pero si sobre a memoria emocional, a súa tensión e a súa urxencia. Ningún de nós esqueceu os seus soños infantís”.

Pola cantidade de galardóns que recibiu, converteuse nunha obra de referencia. Non obstante, foi censurado en bibliotecas públicas e escolares por un sector conservador da sociedade norteamericana, que consideraba escandalosas as páxinas nas que o protagonista aparecía espido.