Queres xogar comigo?

Un ratiño camiña na procura dun compañeiro de xogos pero os animais que atopa —terrestres, acuáticos, voadores— están ocupados en distintas tarefas propias de cada especie. O colorido das ilustracións, a variedade de formas representadas e agrupadas coa técnica da colaxe e a expresividade dos personaxes son cualidades inconfundibles no estilo de Eric Carle. O texto de Xosé Ballesteros, creado expresamente para esta obra, segue a estrutura encadeada das imaxes. Así, o protagonista —máis pequeno que o resto dos animais, procurando que as nenas e os nenos se identifiquen con el— vai descubrindo a identidade de cada un ao paso das páxinas. A través desta sinxela proposta, o reto consiste en descubrir a que criaturas se dirixe o ratiño tendo como referencia o color e a forma da súa cola: de crina, plumas, escamas, pelo...

Tamén se afianzan o sentido da lectura, de esquerda a dereita, e conceptos como “a parte” e “o todo”. Ao longo do relato mantense un esquema narrativo baseado na repetición, xa que o protagonista failles a mesma pregunta a todos animais que atopa. As distintas respostas que recibe redundan na aprendizaxe de novo vocabulario. Tampouco falta o suspense: ao longo da historia, de principio a fin, hai un elemento de continuidade na figura dun misterioso personaxe.

Un conto emocionante e divertido, atractivo dende o punto de vista estético e lúdico, especialmente recomendable para as primeiras idades.