Polo camiño

«Polo camiño» é un poema-canción infantil que desprende ledicia, ritmo e musicalidade. Está protagonizado por distintos animais -dende elefantes a ratos, gatos e osos- que marchan ao ritmo destes versos octosílabos, marcando unha progresión numérica. Así, do 1 ao 10 vanse enumerando personaxes ata chegar a un sorprendente e festivo destino. Logo de «Mamá», a obra coa que Mariana Ruiz Johnson gañou o VI Premio Internacional Compostela de Álbum Ilustrado, «A viaxe de mamá» e «Mientras tú duermes» (Premio Silent Book 2015), neste libro de cartón para pre-lectores e primeiros lectores a autora volve centrarse na familia.

Xunto coa aprendizaxe dos primeiros números, «Polo camiño» tamén contribúe ao coñecemento de distintos alimentos e dalgunhas calidades que caracterizan a quen os porta. O intenso colorido das ilustracións é outro dos alicientes desta divertida proposta de lectura, con figuras dinámicas, expresivas e recoñecibles.