A banda que ninguén coñece

As lectoras e os lectores que ficaron engaiolados coas rimas encadeadas, co humor e cos orixinais personaxes de «Un dous tres, que ves?», «Un dous tres, vampiro ti es» e «Un dous tres, Nadal é», seguirán gozando desta nova obra de Nadia Budde. «A banda que ninguén coñece» destaca polo seu ritmo trepidante e o dinamismo das súas páxinas, nas que acontecen divertidas situacións protagonizadas por uns músicos pintorescos, estrafalarios e nada convencionais, tanto polo seu aspecto como polos instrumentos que tocan.

Trátase dunha historia de crecemento e recoñecemento cunha estrutura que, no plano narrativo, se apoia nas rimas, nas repeticións e nos xogos de palabras. Trala chegada do grupo nunha furgoneta, descríbense as calidades físicas e a indumentaria de cada intérprete. Paralelamente, vaise incrementando o público que observa a presentación. Co inicio do concerto, a atención céntrase nos bailes duns espectadores entusiasmados e no ambiente festivo, que parece rematar cando finaliza o espectáculo.

Lonxe de asustar, os seres de aspecto monstruoso que habitan neste rocambolesco relato suscitan simpatía e curiosidade. As ilustracións son de trazos grosos e deliberadamente imperfectos, con volumes irregulares, cores planas e intensas, nas que se aprecian elementos gráficos —a división das páxinas, os signos cinéticos e acústicos…— próximos á estética do cómic.