As pescadoras

“As pescadoras” é unha adaptación dun conto tradicional da India que destaca polo seu poder evocador dos sentidos a través da descrición de lugares, sons, aromas… Chama moito a atención a fermosa e delicada proposta plástica, a base de minuciosas escenografías con pequenas figuras: personaxes, obxectos e adornos elaborados con madeira, cartón, aramios ou elementos téxtiles, entre outros materiais. As protagonistas son sorprendidas por unha forte tormenta e atopan acubillo na casa dunha hospitalaria florista. Alí descobren que, ante o intenso olor a flores da habitación onde esta lles ofrece repouso, prefiren descansar ulindo a redes, peixes, algas e salitre. Así, o relato presenta o concepto do relativo: que cheira mellor, as flores ou o pescado? Expón tamén o carácter subxectivo de determinadas convencións, costumes ou usos culturais. Ademais, alude a situacións que teñen que ver co esforzo no traballo, a solidariedade ante as adversidades ou a capacidade creativa das persoas para solucionar os problemas que xorden.