Huxley, Aldous

Godalming (Reino Unido), 1894 - Los Angeles (EUA), 1963

Escritor e filósofo. Pertencente a unha ilustre familia británica, en 1908 ingresou no prestixioso colexio de Eton coa intención de converterse en doutor, pero unha queratite provocoulle unha cegueira case total. Tres anos máis tarde e parcialmente recuperado, ingresou no Balliol College de Oxford, onde se graduou en Literatura Inglesa. Traballou despois como profesor e articulista, e publicou durante os anos 20 do pasado século poesía e novelas que lle proporcionaron certo prestixio. En 1930, trasladouse a Francia, onde escribiu «Un espléndido mundo novo». Interesado polo pacifismo, o misticismo e a filosofía  oriental, e preocupado pola situación prebélica en Europa, mudouse a California en 1937. Alí traballou como guionista en Hollywood e desenvolveu unha escritura máis espiritualista, influenciado polo budismo e o hinduísmo. Nos anos 50 experimentou coa mescalina e o LSD, e estas vivencias recolleunas en «The Doors of Perception», ensaio clave no movemento contracultural. Faleceu o 22 de novembro de 1963 debido a un cancro, o mesmo día que John F. Kennedy e C. S. Lewis.