Sete monstros e un gato

Os protagonistas deste divertidísimo paseo son un vampiro, un zombi, unha pantasma, unha bruxa, unha momia, un lobishome e un frankenstein, as figuras máis simbólicas da literatura fantástica e de terror. A este máxico número de personaxes engádese un gato, que permanece alleo ás insólitas peripecias que marcan a progresiva desaparición dos seus compañeiros de camiño e co que -nun sorprendente final circular- podemos volver a empezar esta rítmica e cómica odisea, unha e outra vez. «Sete monstros e un gato» é un enxeñoso texto rimado de Rafa Ordóñez que, a través dunha fórmula repetitiva, invita a contar do un ao siete restando un número en cada volta. O sentido decrecente desta numeración débese á sucesiva marcha dos monstros que, lonxe dos estereotipos asociados a estes seres tan horribles, non só non dan nada de medo, senón que resultan ser torpes, medorentos, vergonzosos… As ilustracións de Christian Inaraja reforzan o sentido do humor que inunda cada páxina. O dinamismo e a expresividade dos personaxes é a clave desta proposta sinxela, de trazos irregulares e que xoga coa iconografía dos sete monstros: moscas, arañas e morcegos acompañan a esta singular comitiva, á que se suman outras tantas criaturas -un paxaro, un caracol, unha ra…- que anticipan a curiosidade das lectoras e dos lectores ante a evolución desta rocambolesca historia.