Por que?

A senrazón da guerra, a violencia, a vinganza, a devastación e a morte asómanse en toda a súa crueza ás páxinas deste libro visual; unha fábula que comenza coa bucólica estampa dunha ra gozando do arrecendo dunha flor, ata a irrupción dun rato que a ataca para quitarlla. Xorde daquela unha loita entre dous bandos cada vez máis numerosos en individuos e medios bélicos que dá lugar a emboscadas e bombardeos. Dun prado florido, a un lugar desolado; dunha minucia, a un gran conflicto sen ter mediado nin unha soa palabra. A Segunda Guerra Mundial deixou unha fonda pegada na nenez de Nikolai Popov: o avance do exército nazi sobre a Unión Soviética, as bucinas marcando a apresurada fuxida da poboación aos refuxios, xogar entre os restos das bombas sen comprender o seu efecto letal ata que unha explotou nas mans doutro neno, o recordo dos soldados mutilados voltando trala rendición alemá… Pero sería a obra de Tolstoi, Dostoyevski, Hemingway e Remarque o que decantou a ideoloxía pacifista do autor de “Por que?”.

Esta edición de KALANDRAKA recupera a versión orixinal da obra, sen texto. Porque as ilustracións, de estilo clásico, teñen un gran poder comunicativo e narran visualmente a historia, ata extremos impactantes pola súa capacidade para reflectir o galopante delirio militarista e destrutivo. Fronte á barbarie, o propio autor alenta os lectores a seren promotores do diálogo, da tolerancia, da convivencia e da paz.