NÚRIA FIGUERAS E ANNA FONT, EN COMPOSTELA CON "A VISITA"

Comezan as actividades arredor do acto institucional de entrega do XVI Premio Internacional Compostela de Álbum Ilustrado ás autoras de «A visita», Núria Figueras e Anna Font, que manterán senllos encontros con alumnado de Bacharelato Artístico do IES do Sar e con futuras mestras e mestres que se forman no CIFP Compostela.

Na sesión programada no IES do Sar abordarase fundamentalmente o proceso de creación da obra e os aspectos que máis teñen que ver coa técnica artística empregada pola ilustradora.

Aínda que a historia que conta «A visita» transcorre en plena noite, as páxinas deste libro destacan pola súa luminosidade e colorido: dende un bosque de vexetación esquemática, cun cromatismo exuberante e repleto de matices, a obra fai que as lectoras e os lectores se adentren nun cálido tobo onde se atopa a simpática figura da raposa e o trazo sinxelo co que se resolve a representación de algo tan intanxible e invisible como o Silencio; un minimalismo gráfico extensible tamén a outros elementos simbólicos como os latexos do corazón e os pensamentos da protagonista.

Na actividade que se vai desenvolver no CIFP Compostela as autoras van debullar as distintas lecturas que ofrece «A visita», como o papel positivo do Silencio para axudarnos a reflexionar, a practicar a introspección, a escoitarnos, coñecernos e saber que sentimos. «A visita» é un relato delicioso, orixinal e necesario que toma pinceladas dos contos clásicos, ademais de establecer un diálogo áxil e tenro entre os os personaxes. A través dos recursos literarios que emprega, anima as lectoras e os lectores a tomar conciencia do seu mundo interior, a gozar desas sensacións, e a redescubrir a súa propia esencia.