A psicoloxía infantil e a nova educación

Este sexto volume da Biblioteca de Pedagoxía contén os ensaios “Bases psicolóxicas dos novos métodos pedagóxicos” (1935) e “O dereito á educación no mundo actual” (1948). Estes textos de Jean Piaget abordan o interese do autor pola renovación pedagóxica, a defensa dos métodos activos de ensino, e avogan pola necesidade de que se teñan en conta as achegas da psicoloxía para anovar a educación. Son numerosos os tratados sobre a obra intelectual de Piaget, así como a aplicación dos seus conceptos no eido da innovación didáctica, sendo constantes as mencións ás posicións piagetianas na bibliografía internacional.

O psicólogo suízo investigou a construción da intelixencia e o desenvolvemento do pensamento na infancia e na adolescencia. A súa contribución nestes campos fixo del un referente fundamental para os estudos de Psicoloxía da Educación e para a evolución da Pedagoxía. A actual psicoloxía cognitiva -como paradigma de maior credibilidade académica- ten nas teses e nos estudos de Piaget un piar fundamental. A súa teorización é coñecida como “construtivismo psicolóxico”.

A obra complétase cun texto do catedrático do Departamento de Psicoloxía Evolutiva e da Educación na Universidade de Barcelona, Eduard Martí Sala, doutorado en Psicoloxía pola Universidade de Xenebra, sendo colaborador de Jean Piaget no Centro International de Psychologie Genétique.