Kesey, Ken

(Estados Unidos, 1935 - 2001)

Estudou xornalismo na Universidade de Oregon. Fíxose famoso coa súa primeira novela, «E un voou sobre o niño do cuco» (1962). Canda un grupo de amigos creou o grupo «Alegres bromistas» -pioneiro na experimentación co LSD e coa marihuana- co que percorreu os Estados Unidos nun autobús pintado con colores fluorescentes e chamado «Máis alá». Nesta experiencia baseáronse algúns dos elementos que darían lugar ao movemento hippie. No seu itinerario colaborou o grupo Grateful Dead, que acompañaba con música psicodélica as sesións abertas de consumo de LSD que organizaba o propio Kesey, destacado polo seu enfoque irreverente e imprevisible da Contracultura, baseada na cultura pop (cómic, ciencia ficción e rock&roll) norteamericana. A persecución policial levou a Kesey a dar por superada a súa etapa coas drogas, aínda que ata o seu pasamento seguiu sendo un referente do underground.