FÁBULAS AFRICANAS CON BONIFACE OFOGO EN LIBROS PARA SOÑAR
Trala súa recente participación nun festival internacional de narración en México, Boniface Ofogo volve o venres 23 de maio á libraría LIBROS PARA SOÑAR de Vigo (Triunfo, 1) para seguir compartindo coas nenas e cos nenos o legado ancestral dos pobos africanos a través das fábulas tradicionais. O narrador camerunés será o invitado especial da habitual sesión de contacontos, a partir das 18:00 horas, na que repasará as súas obras publicadas no catálogo de KALANDRAKA.
O protagonista de «O elefante que perdeu o seu ollo», ilustrado por Marc Taeger, descobre a importancia de manter a serenidade para afrontar situacións difíciles. «A paso de tartaruga», ilustrado por Rebeca Luciani, conta como a criatura máis lonxeva, sabia e perseverante logra a supervivencia de toda a fauna, superando outros animais máis áxiles e impoñentes. Con ilustracións de Elisa Arguilé, a historia de «O león Kandinga» conta como a crueldade, o egoísmo e a avaricia conducen á soidade.
Boniface Ofogo estudou Filoloxía Hispánica na Universidade de Yaoundé e ampliou a súa formación en Madrid, onde foi mediador intercultural. Dende 2005 dedícase en exclusiva a percorrer escolas, bibliotecas, librarías e centros socioculturais co seu repertorio de historias, especializado nas fábulas, lendas, mitos e tradicións da África negra.
UNA VIDA DE CUENTO
«Una vida de cuento» é o novo libro deste autor, que chegará proximamente ás librarías. Trátase da edición renovada dunha obra autobiográfica que abrangue dende a súa infancia en Omassa ata a actualidade, tras máis de 30 anos de oficio como contador de historias, percorrendo o mundo enteiro.
Enmarcado na colección Puntos cardinales, que recolle o testemuño de destacados referentes da Literatura Infantil e Xuvenil contemporánea, «Una vida de cuento» plasma a longa experiencia de Boniface Ofogo como “artista da palabra” a través da cultura oral popular dos pobos africanos. O autor acredita o vínculo entre a narración e a animación á lectura, ademais de reivindicar que os contos e a tradición oral “son unha forma eficaz de loitar contra o proceso de deshumanización no que estamos inmersos” nesta sociedade globalizada e hipertecnolóxica.
A partir do seu desexo de unir o pobo africano coa súa diáspora americana, «Una vida de cuento» tamén achega unha reflexión sobre a transmisión oral entre os sucesores dos máis de vinte millóns de escravos que chegaron ao Novo Continente e os seus predecesores das tribos mandinga, bakongo, yoruba e ashanti.
