Ramón Cabanillas. Escolma poética

No Ano Cabanillas, co gallo do 50 aniversario do pasamento deste autor senlleiro, a Sociedad Estatal de Conmemoraciones Culturales e FAKTORÍA K fanlle unha homenaxe especial ao ‘Poeta da Raza’. Un libro de poemas e imaxes para ler e admirar pausadamente; reflexionando sobre cada idea, saboreando as súas cores evocadoras. Pousado sobre un atril, as súas páxinas desprenderán un halo de misterio que inundará o espírito do lector. Xornalista crítico, funcionario municipal, cantor nostálxico das paisaxes nativas, autor de versos galeguistas e combativos, académico da lingua, admirador dos artistas galegos do seu tempo... Na faceta literaria, Ramón Cabanillas foi o continuador do Rexurdimento, o enlace con Rosalía de Castro, Curros Enríquez e Eduardo Pondal, o renovador da poesía galega: o ciclo artúrico, a etnografía, o amor. Débeselle especialmente a promoción do uso da lingua en todos os ámbitos da vida cotiá.

Luis Rei compila os poemas desta escolma poética. Bibliotecario e técnico de Cultura no Concello de Cambados, tamén é autor da obra “Ramón Cabanillas, crónica de desterros e saudades”, e ten publicado numerosos artigos e traballos sobre o poeta cambadés.