A árbore xenerosa

“A árbore xenerosa” é un clásico de 1964 para lectores de todas as idades que presenta -en clave crítica- reflexións e lecturas diversas: unha amizade incondicional e desinteresada que non é correspondida en igual medida; a relación co noso planeta, constantemente agredido; a contraposición entre as necesidades materiais e o intanxible, para acadar a felicidade; e mesmo unha parábola da familia... O texto é unha sucesión dinámica de accións arredor da figura central da árbore que, ao longo do tempo, interactúa cunha persoa. Toda unha vida transcorre nesta historia tenra e conmovedora, cun pouso de tristura: dende a nenez, cando os dous xogaban; ata a idade adulta e a etapa anciá, diferenciadas polo contraste entre “querer” e “necesitar” como actitudes vitais. Sen pedir nin agardar nada a cambio, a xenerosidade e o amor sen límites son o sinal de identidade dunha árbore que é feliz facendo feliz o Neno.

Shel Silverstein tardou catro anos en publicar “A árbore xenerosa”, ata que Tomi Ungerer animouno a propoñerllo á editora Ursula Nordstrom. “Porque a vida ten fermosos finais tristes. Non tes que rir aínda que a maioría das miñas obras sexan graciosas”, explicou o autor, cuxos libros invitan a soñar e a atreverse a imaxinar sen límites.

A nivel estético destaca a súa economía de medios, o minimalismo e a expresividade das ilustracións-en branco e negro- elaboradas coa estética das viñetas.