Grazas

Ter paciencia, valorar a disciplina e obedecer os maiores. Saber gañar e perder, integrarse nun equipo, practicar o compañeirismo. Saber escoitar e disfrutar do silencio, ir afrontando retos para perder os medos, ser prudentes e perseverantes. Apreciar a beleza dos momentos e das cousas que nos rodean… “Grazas!” é unha mensaxe en forma de álbum ilustrado dirixida a cantas persoas pasan pola nosa vida e contribúen á nosa educación, axudándonos a forxar a nosa maneira de ser e de actuar na sociedade: a familia, os amigos, a veciñanza, a escola... Contado en primeira persoa con frases breves que describen situacións cercanas e cotiás, permite que os lectores se identifiquen con vivencias propias ou experiencias próximas. As ilustracións -a base de trazos soltos e cores luminosas que transmiten positivismo- reflicten escenas do fogar que transcorren no campo e mais na cidade, encontros con xente moi diversa coa que se interactúa día a día, espazos para a diversión e o xogo. …Unha aprendizaxe que traspasará a nenez e durará toda a vida.