FEIRA DO LIBRO DE VIGO: ROSALÍA FERNÁNDEZ RIAL PRESENTA "DE CENTEO E DURMIDEIRAS"
«De centeo e durmideiras» é o novo poemario da profesora, escritora e artista multidisciplinar Rosalía Fernández Rial, publicado nunha edición bilingüe por Cuatro lunas, un selo editorial de KALANDRAKA. Trátase dunha obra sensual, feminina e sinestésica na que a autora condensa paixón, vigor e sensibilidade. A Feira do Libro de Vigo, que se celebra na Praza de Compostela, acolle un recital de presentación da obra o martes 2 de xullo a partir das 20:00 horas.
Como sinala a poeta Yolanda Castaño no limiar, os versos de Rosalía Fernández Rial destacan polo seu “centrífigo fulgor” evocando a “paisaxe de dous corpos femia de horizonte circular”. A autora constrúe unha illa poética na que conflúen fauna, flora e corpo formando unha superficie arquitectónica e natural.
Con Safo e Alceo como referentes literarios, «De centeo e durmideiras» mostra un universo íntimo caracterizado pola espontaneidade e o arrebato. “Centeo”, “Marea negra” e “Durmideiras” son os tres campos cultivados nestas páxinas de palabras e escuma nas que o amor agroma, a pel xermola e o salitre titila. No seu eterno ciclo de devastación e renovación, cada estrofa reborda paixón, excitación e loucura.
Distinguida recentemente co VII Premio Vidal Bolaño 2024 de textos teatrais, a dimensión poliédrica de Rosalía Fernández Rial non deixa de medrar. Tras licenciarse en Filoloxía da Universidade de Santiago, a súa faceta académica enfocouse cara á didáctica das linguas e da expresión dramática, culminando no seu doutoramento. Ademais da dimensión artística e musical que proxecta no grupo Chicharrón, destaca sobre todo como escritora e poeta, sendo artífice dun corpus literario marcado pola orixinalidade e a capacidade de renovación: «En clave de sol» (2009), «Átonos» (2011), «Un mar de sensacións» (2012), «Vinte en escena» (2012), «Ningún amante sabe conducir» (2014), «Contra-acción» (2016) ou a antoloxía bilingüe «Sacar a bailar. Poesía reunida» (2009-2016), «Árbores no deserto» (2020) e «Desnortada» (2021) dán conta da súa extensa creatividade.
Como en boa parte dos seus proxectos, «De centeo e durmideiras» tamén conta con senllas dimensións escénicas e audiovisuais nas que a poesía convive coa música e a imaxe.
A participación de KALANDRAKA na Feira do Libro de Vigo continúa o martes día 2 coa presenza do poeta Antón Reixa na caseta de Cartabón, a partir das 19:30 horas. Asinará exemplares da súa primera escolma poética, «Enciclopedia perplexidade» e mais «Melancoholemia. Vida de mamarracho», ambos publicados na colección Rizomas.
O venres día 5 ás 19:15 horas o pintor e ilustrador vigués Ramón Trigo presenta «Labirinto» nunha conversa con Branca Trigo na que non faltará a lectura de textos poéticos e a performance artística. Ás 20:00 horas a xornalista Tereixa Constenla asina exemplares de «Abril é un país» na caseta de Cartabón.
Por último, o sábado 6 a partir das 12:30 horas a ilustradora Lucía Cobo asina exemplares de «Osa» na caseta de LIBROS PARA SOÑAR.
